Putin naqd rublni olib chiqishni cheklab qoʻydi: Oʻzbekiston roʻyxatda
Yangi farmonga koʻra, jismoniy shaxs Rossiyadan 1 million rubldan (≈$12 300) ortiq naqd pulni Oʻzbekiston, Tojikiston, Ozarbayjon va YeoII davlatlariga olib chiqolmaydi; yuridik shaxslar uchun naqd rubl olib chiqish umuman taqiqlandi.
Rossiya prezidenti Vladimir Putin mamlakatdan naqd rublni olib chiqishni cheklovchi farmon imzoladi. Hujjat imzolangan kuni — 29-sentabrda kuchga kirdi.
Yangi qoida
Farmonga koʻra, jismoniy shaxs Rossiyadan 1 million rubldan (taxminan 12 300 dollar) ortiq naqd pulni Yevrosiyo iqtisodiy ittifoqi aʼzo davlatlari, Ozarbayjon, Tojikiston va Oʻzbekistonga olib chiqolmaydi. Yuridik shaxslar va yakka tartibdagi tadbirkorlar uchun esa naqd rublni bu davlatlarga olib chiqish miqdoridan qatʼi nazar taqiqlandi.
Istisno bor: jismoniy shaxs 1 million rubldan ortiq naqd pulni xalqaro aeroport oʻtkazish punktlari orqali, olib chiqilayotgan summani toʻliq qoplaydigan bank maʼlumotnomasi bilan olib chiqishi mumkin. Oʻz bank hisobidan yechilgan pul ham istisnoga kiradi.
Nima oʻzgardi
Ilgari jismoniy shaxslar uchun chegara ancha yuqori — taxminan 100 000 dollar boʻlgan va Ozarbayjon, Tojikiston hamda Oʻzbekiston bu cheklovga kirmagan. Yangi farmon aynan shu davlatlarni roʻyxatga qoʻshdi.
