Germaniya Oʻzbekistonga 71 million yevro ajratadi: 2026–2027 yillardagi 8 loyiha
Toshkentda oʻtkazilgan hukumatlararo muzokaralarda Germaniya iqtisodiy rivojlanish, ijtimoiy himoya, qonun ustuvorligi, iqlim va energetika sohalaridagi sakkizta loyiha uchun 71 million yevro ajratishga kelishdi.
Germaniya Oʻzbekistonga iqtisodiy rivojlanish, ijtimoiy himoya, qonun ustuvorligi, iqlim va energetika sohalaridagi qoʻshma loyihalar uchun 71 million yevro ajratadi.
Kelishuv 2026-yil 7-oktabr kuni Toshkentda oʻtkazilgan rivojlanish hamkorligi boʻyicha hukumatlararo muzokaralarda erishildi. Tomonlar muzokaralar yakunida tegishli Bayonnomani imzoladi. Germaniya mablagʻi 2026–2027 yillar uchun moʻljallangan 8 ta loyihani qamrab oladi.
Qaysi sohalarga
Hamkorlikning asosiy yoʻnalishlari: savdo va xususiy sektorni mustahkamlash; Germaniyaning dual (ikki tomonlama) taʼlim modeli asosida kasb-hunar taʼlim tizimini modernizatsiya qilish; resurs samaradorligini oshirish; qayta tiklanuvchi energiya manbalarini joriy etish; elektr uzatish tarmogʻini kengaytirish; hamda nochor qatlamlar uchun ijtimoiy himoyani yaxshilash.
Kim amalga oshiradi
Loyihalar Germaniya hukumati nomidan KfW taraqqiyot banki, GIZ (Germaniya xalqaro hamkorlik agentligi) va PTB (Germaniya milliy metrologiya instituti) tomonidan amalga oshiriladi.
Oʻzbekiston tomonidan muzokaralarda Investitsiyalar, sanoat va savdo vazirligi ishtirok etdi; nemis tomonini Germaniya Iqtisodiy hamkorlik va taraqqiyot vazirligi (BMZ) vakillari boshqardi.
Nemis tomoni bayonoti
Nemis delegatsiyasi rahbari Christiane Amari Germaniyaning «Oʻzbekiston-2030» strategiyasi va BMT Barqaror rivojlanish maqsadlariga erishishni ikki tomonlama loyihalar hamda mintaqaviy tashabbuslar orqali, shuningdek Yevropa Ittifoqi hamkori sifatida qoʻllab-quvvatlashga tayyorligini bildirdi.
Germaniya koʻp yillardan beri Oʻzbekiston uchun rivojlanish hamkorligidagi yirik sheriklardan biri boʻlib kelmoqda.
