Oʻzbekistonda 15-oktabrdan umummilliy biznes roʻyxatga olish boshlandi
Vazirlar Mahkamasining 557-son qaroriga koʻra, 15-oktabrdan 30-noyabrgacha umummilliy biznes roʻyxatga olish oʻtkaziladi. U barcha yuridik shaxslar, tadbirkorlar va norasmiy bizneslarni qamrab oladi; natijalar 2027-yil 1-sentabrgacha eʼlon qilinadi. Kuzatilmaydigan iqtisodiyot qariyb 246 trillion soʻm (23%) deb baholanadi.
Oʻzbekistonda umummilliy biznes roʻyxatga olish boshlandi. Vazirlar Mahkamasining 2026-yil 9-oktabrdagi 557-son qarori bilan uni oʻtkazish tartibi tasdiqlangan. Roʻyxatga olish 15-oktabrdan 30-noyabrgacha davom etadi, hisobga olish sanasi (kesim nuqtasi) — 1-oktabr soat 00:00.
Kim qamrab olinadi
Sanoq yuridik shaxslar, yakka tadbirkorlar, dehqon xoʻjaliklari, oʻzini oʻzi band qilgan shaxslar hamda davlat roʻyxatidan oʻtmasdan faoliyat yuritayotgan bizneslarni qamrab oladi. Yuridik shaxslar hisobot portali (hisobot.stat.uz) orqali, oʻzini oʻzi band qilganlar esa census.stat.uz orqali oʻzini roʻyxatdan oʻtkazadi; roʻyxatchi xodimlar ham soat 9:00–18:00 oraligʻida tashrif buyuradi. Soʻrovlar 1851 qisqa raqami orqali qabul qilinadi.
Nega bu kerak
Statistika qoʻmitasi maʼlumotiga koʻra, kuzatilmaydigan iqtisodiyot hajmi qariyb 246 trillion soʻm — yaʼni 23% ni tashkil etadi. Band boʻlgan 15,2 million kishidan 6,5 millionining (42%) daromadlari toʻliq hisobga olinmaydi. Har 4–5 soʻmdan biri rasmiy statistikadan tashqarida qolmoqda.
Keyin nima boʻladi
Roʻyxatga olingan subʼektlarning 5% gacha qismi yopilgandan soʻng 10 kun ichida namuna asosida qoʻshimcha tekshiruvdan oʻtkaziladi. Yakuniy natijalar 2027-yil 1-sentabrgacha eʼlon qilinadi.
